是觀眾離棄了你，還是你遠離了觀眾。作為台慶月，TVB推出兩部重點劇《來自喵喵星的妳》和《幕後玩家》都收視見底，其中《來》更創下有史以來 台慶劇的最低紀錄。如果識揀，調一調留番部《城寨英雄》或《律政強人》嚟頂一頂，就已經靚仔晒啦！
其實曾幾何時，台慶是香港人的事，不單止11 月19係大日子要早啲返屋企睇電視，而且成個台慶月仲會有至少兩套台慶劇做勢，有時仲會四劇橫行，晚晚追到冇時間做功課。趁今日係TVB的大日子 ，就同大家回顧下當年你我他，還會一起追台慶劇的日子。
五虎將之稱霸
考究唔到由邊年開始有台慶劇出現，如果以該年11月播出的劇集便歸納為台慶劇的話，咁80年代就係五虎將的天下，年輕的都唔知你五虎將係乜，其實 即係指當時得令的五位小生，即梁朝偉、劉德華、黃日華、苗僑偉、湯鎮業，其中83年就以劉德華、陳玉蓮主演嘅《神鵰俠侶》出戰，至今仍為經典。
1985年更集齊五虎拍咗套只得5集的短版台慶劇《楊家將》，志在晒冷。不過五位之中，又以朝偉在台慶月最旺場，單單由佢孭飛嘅台慶劇，就由84至86年分別以《新紮師兄》、《新紮師兄續集》及《倚天屠龍記》連續三年穩佔一哥地位，其中《新紮師兄續集》陣容最強，周潤發演孻叔，任達華做韓 彬。全班同學晚晚追，第二朝玩鬥記對白，仲隨意抽一節出嚟重演，真係睇少晚都被孤立。
天地有正氣Peter朱
新一代認識萬梓良，可能源於《旺角卡門》的Tony、《賭俠大戰拉斯維加斯》Peter朱，或者《古惑仔》系列嘅蔣生。其實對7、80後嚟講，萬子就係台慶劇。自《流氓大亨》一句口水鼻涕一齊嚟嘅"So What！"震撼整個電視界，從此奠定大台阿哥地位。
而當時萬子哥已經拍電影為主，電視劇只限一年一部，所以通常都係台慶劇先會碌佢卡回巢，演出的多數都係天地有正氣的角色。1989年的《他來自江湖》遇上剛冒起嘅星爺，雖然有少許被搶戲感 覺，不過他飾演退隱江湖嘅天哥依然鎮得住個場，收視高企。
1990年《笑傲在明天》，對手換上吳鎮宇，由輕鬆搞笑轉為時代劇，以1980年代背景講香港人面對主權移交問題，今時今日睇番應該仲有感覺。1991年有《大家族》，開啟家族式恩怨情仇劇集模式，萬子飾演的蔣進，係有錢佬關海山個私生子，跟幾位嫡系阿哥細佬曾江、朱江、劉錫明，有鬥餐死有相扶持，睇得相當肉緊。
因為收視食糊，翌年再拍同類題材《巨人》，但非台慶劇之列。去到93年，同張衛健主演嘅《龍兄鼠弟》，萬子哥唔再家族情仇，純玩個人表演，演飾一個性格怪異，行事偏鋒的醫生，向醫療制度及殺人犯挑戰。
